My new blog

因為yahoo blog將會關閉，所以要搵另覓新居，唔想之前寫嘅野無晒。

Search個網上意見後，較多人推介係blogspot，所以已經開左account。而家諗緊點樣將d舊文章搬去blogspot，已知blogspot有個function可以㿬入文章，但唔知格式同d相會唔會走樣。

而且，以我僅有嘅知識理解，我要滙出左係yahoo blog 嘅posts，save 左落電腦度之後，先可以係blogspot滙入係電腦度嘅documents。

但一係yahoo blog 滙出posts，係所有posts，個yahoo blog即刻變唯讀模式。

所以呢個係最後嘅post，過幾日得閒d，就搬晒d野過去新blog 度。（網上有人話backup yahoo blog 嘅posts，約60個，需時約5粒鐘！crazy！）

呢個係新blog地址：hiellablog.blogspot.hk

得閒就過去坐下la！！！

閱讀更多 »

京都大阪旅行 2013 - Day 4 清水寺、京都駅

今朝起身有d肚痛，之後肚痾左3次先好d，但個胃有少少頂住。我同老公都覺得，應該係琴晚係道頓堀食燒餅果餐有d唔乾淨，因為果度太多食肆，其實係有d污漕。但係老公又無事wo，因為佢腸胃不嬲都好過我

執拾好行李，去check-out 左先，再寄存行李係酒店到，就出發去清水寺。搭巴士約20分鐘到，沿住指示牌行上清水坂，約15分鐘就到。


清水坂兩旁有好多手信店，但可能仲早（果時約10點），大部份仲係度開緊舖，所以諗住行完清水寺，番落黎先睇過。但遊客就已經好多la，同係金閣寺時差唔多，好彩呢度地方大d、
闊落d，先無咁擠逼。

我地沿住既定路線行、影下相，約30分鐘度，好快就行完清水寺。

之後落番去清水坂買手信，就搭番巴士去京都駅。有d肚餓，就直接上去京都拉麵小路，係京都駅上面。呢度有幾間拉麵店，求其搵一間就開餐。其實，我又唔覺特別好食，一樣係好味精，試一次就ok。

食完去地下The Cube，轉賣京名菓，又買左d手信。

時間仲早，就番酒店攞行李，順便係lobby攤抖下，去下洗手間、同上wifi（曾經係住客先上到），係無人理我地ga...hahaha

到左咁上下時間，就去京都駅，搭Haruka 去關西機場，番HK lu。

去到機場 CX counter check-in，個staff 話今日班機好full，問我地會唔會揀搭聽日早機先番HK。我地呆左2秒之後，我話唔可以，聽日要番工，同埋叫佢出張broading pass 時，畀番e-ticket 上面已reserve 左個位我地。

CX 就係咁煩，你班機咁full 係你攪成咁，真係唔明點解佢地可以問得出口！bear〜〜〜

呢個機場係無野行ga，我地去starbucks 用埋d coins，就上住wifi，等上機。

夜晚9點到HK，但我地10點令先離開機場，因為等行李等左大半個鐘。好攰！

後話：

今次再到京都大阪，畀我知道，以後無乜野應該唔會再黎。至於日本其他地方，一樣咁諗。因為無乜野特別吸引我，對日本文化嘅喜好只係普通。而且今次有太多旅行團、遊客，感覺擠逼。

閱讀更多 »

京都大阪旅行 2013 - Day 3 大阪梅田、心齋橋、道頓堀

食完早餐，就搭JR去大阪，心情係好興奮，因為終於等到聽concert。

半粒鐘去到梅田就落車，首先係連接JR梅田站嘅伊勢丹同大丸行下，同埋買手信。

行左個令鐘就走la，之後係梅田地下街度，對住地圖硏究左幾分鐘，老公先決定到邊個方向係去魚心壽司。

呢條地下街四通八達，間唔時就有張牆上地圖畀人參考。雖然呢張地圖show到我地應該係exit
M11出，但望勻成條地下街，係無指示exit M11應該行邊個方向。只有當你去到個出口，就先會見到＂M11＂呢個字。

所以，老公就硏究方位，加上d商場名做參考，就搵到M11 la...ai...

一出行幾步就見到魚心壽司，入去d staff見我地唔識講日文，就畀張英文menu我地睇。

片魚生真係超大塊，最好食係帶子（開頭無影相，只掛住食），同埋拖羅，正！

呢餐好快食完，見仲有時間，就係附近行下。但行行下先發覺條街嘅大部份舖頭，係只適合18歲或以上人仕入內。咁我地就走la，行去梅田芸術劇場，約10分鐘路程je。

仲有成大半粒鐘先有得入場聽concert，就去對面間Lawson行下，買下野飲。

終於開始入場，見有場刊買，就去排隊用2千円買左一本。坐低左先攞本場刊出黎睇，OMG，除左個song list 係英文之外，其他內容嘅全部係日文！唉！

等左約20分鐘，正式開場la，yeah！

個 concert 約2粒鐘就完左，係超唔夠喉。同埋，為左迎合日本人，有幾首歌係英文版嘅，佢地將某d部份用日文黎唱，好無奈！總之，有d失望。如果畀我再揀，我係唔會特登黎日本聽呢個concert。

有d失落咁行去中津地鉄站，本身諗住搭去日本橋，行下黑門市場，但係又熱又攰又無乜心機，就決定直接去心齋橋。是但係心齋橋其中一個地鉄出口上左去地面，嘩，人海ar！

就好似去左一個超大型嘅特賣場咁，到到都寫住SALE，兼且門口個staff仲攞住個紙製嘅喇叭，大嗌一輪咀嘅日文，估計係特價呀埋黎睇喇。而且，我隔離左右多數係講廣東話或普通話，同係HK無分別。

係呢個人海嘅情況下，見到想入嘅舖頭，只係門口望左兩野就走。我地就齋行去固力菓地標，影左2張相，就轉去道頓堀搵野食。

一路行，行到好遠，開始無咁多人，就揾左間食燒餅嘅。求其點左d野食，好快食完就行返去心齋橋。

人少左d，就好快速咁買左2件衫。無錯，我返到黎HK先諗，點解淨係買得2件衫咁少！但果刻真係無乜mood，只係想快d離開呢個咁多人嘅地方。

臨走去大丸地庫，又買左d手信，同埋雞蛋pudding，留黎今晚係酒店食。

之後，就搭番地鉄御堂筋線去梅田，再轉JR番京都。

閱讀更多 »

京都大阪旅行 2013 - Day 2 (Part 2) 金閣寺、祗園、河原町

我地搭嵐電去金閣寺，中途係帷子過對面缐轉車。不過要行快幾步，原來好多人都係呢個站轉車，我地唔知頭唔知路，諗住慢慢行，點知一上車，架車即刻閂門開車。

坐到去總站北野白梅町，出車站轉左，過條馬路就係巴士站。其實可以行大約25分鐘，就到金閣寺。但太陽仲係好曬，都係搭巴士好d。

巴士站會有顯示器，話畀你知架巴士去到邊。去金閣寺嘅巴士係好多人，要企，好彩2個站就落車。

落車跟住人群行，上條斜路，已到左金閣寺。

買飛入場後，係超多人ar，個正面影相靚位，就好似之前我地企係尖咀海旁影黃色巨鴨一樣，大家一見有吉位即攝入去影。

咁當然我地亦一樣，如果唔係企係度乾蒸。不過，影完2張就繼續向前行，因為好多人同好鬼熱。

我地逗留左20分鐘度，就已經行完，因為地方唔係好大。

見仲有3個鐘先食dinner，咁就去番袛園辻利，食琴日食唔到嘅綠茶雪糕。

老公話搭的士去，因為真係好熱。但我地之前買左巴士一日乘車券，所以梗係搭巴士la。

但架巴士又係好多人，岩岩剩番一個位，我就坐，老公企。

之後每個站都有人上車，逼到已經無位企，但d人仲keep住逼上黎。成架車d冷氣唔係好夠，坐得逼仲要背脊流緊汗，攪乜ar......

熱左成個半鐘，先到祗園，感覺係好攰好頸渴。

一落車就行去辻利，點知......又攪乜ar，點解有成二十幾人排隊等緊位ga！！！

如果係呢個時候，我仲堅持食辻利，我應該係儍ga。即刻求其搵第二間，2分鐘就有位。

一打開menu，就明白點解辻利咁多人等，因為款式係多d。但味道，我覺得都好好食，簡直透心涼，正！

食完，係袛園買下手信，就慢慢行去河原町，其實過條橋已經係。

過條橋嘅時候，見到對面一排對住河景嘅餐廳，有人坐係露天嘅地方嘆緊下午茶；而前面就見到一少堆一少堆日本人就咁係條河堤上蓆地而坐，傾下偈，有d係度野餐，享受黃昏靚景，感覺好寫意。

但一過完橋，就好似去左銅鑼灣咁，條街周圍都係人，因為呢度有好多百貨公司同大型品牌連鎖店。

我地轉入去橫巷，去左錦巿場，類似街市嘅地方。但已經係下午6點，d舖頭開始收檔。

行左一陣，就搵番係google map search 嘅路口，轉入去我地今晚dinner嘅地方。

係飛黎日本前一個禮拜，睇旅遊書介紹，去呢間食懷石料理嘅website book位。本來book琴晚，但佢email覆我話full 左，今晚就ok。

開門入去，無reception，但就有人唔知係邊度行出黎，咁就話畀佢聽book左枱，再show張email booking confirmation畀佢，佢睇完用英文叫我地等一陣。

幾秒後，頭先個staff出番黎，叫我地除鞋換拖鞋，再帶我地上樓。佢同另一個staff負責serve我地，全程係用流利英文同我地講野。呢樣野令我地呢餐食得好自在，終於溝通到。

佢畀左間獨立個室我地，其實我唔慣屈住隻腳坐住黎食野，老公就覺得ok，咁我就唯有伸直隻腳。好彩我腳短，對腳伸直左都無係枱底突出黎...hahaha

呢度無fixed menu，只係喺book嘅時候，揀個budget，之後佢再按budget整menu。

呢餐食左3粒鐘，因為佢地係逐碟上菜，每次送野食黎，都會好小心咁收左之前嘅餐具，再好有禮貌咁問我地之前道菜好唔好食，然後又好細緻同有次序咁將下一道菜擺係我地面前，又再介紹呢一道菜係咩黎，講完就閂門走。但佢地好似知道我地幾時食完，到咁上下時間，又再送野食黎，有d懷疑間房有CCTV，雖然唔見有。

每道菜份量雖然好少，但我地走嘅時候係好飽，而且佢地實在好親切，真係very good

食完就搭巴士番酒店lu。

閱讀更多 »

京都大阪旅行 2013 - Day 2 (Part 1) 嵯峨野觀光小火車、天龍寺、嵐山

8點令去到酒店餐廳食早餐，有個小型buffet，款式不多，主打日式食物，有好多好多漬物、粥冷麵飯、麵豉湯、煎三文魚、厚蛋、麵包、茶咖啡鮮奶。

我揀左白粥、三文魚、蛋。食完之後，我決定黎緊2日早餐淨食一大碗白粥+麵包，因為三文魚同蛋都係凍嘅，而且我對其他野食完全無興趣。

我見其他日本住客係食一大碗白飯同麵豉湯、加好多漬物，但我同老公都覺得日式早餐唔係好岩我地口味。

食完出發去嵐山。首先去巴士站嘅自動販賣機，預先買張＂巿巴士專用一日乘車卡＂，晏d係嵐山番黎用。

之後，搭JR去馬堀駅，架車竟然逼滿人，但大部份人又係1、2個站後落車。

出左馬堀駅，轉左行已見到有指示牌寫住嵯峨野觀光小火車。
今日非常好天，太陽好猛又熱。行左幾分鐘，過左隧道，已見一大片綠油油草地。

一路行一路影相，幾步路已經到龜崗駅。呢個嵯峨野觀光小火車可以係呢度上車去嵯峨野駅或由嵯峨野駅上車去龜崗駅。(http://www.sagano-kanko.co.jp/)

上去龜崗駅買車飛，佢只浄番第5卡無窗車箱，其他已畀旅行團book左。

架小火車未到，就係度周圍影相，同埋行下鋪頭仔，買左d手信。

之後有鐘聲響左2下，表示小火車就到，全世界人就湧到月台（包括我地）去影小火車黎果刻。有個車長伯伯會係月台叫人係自己坐果個車箱前排隊。

埋站後，落左車嘅人企係個唔係好闊落嘅月台同小火車影相，等上車嘅人又唔知點解急住上車（但所有座位係指定席黎ga bo） ，搞到有d......

總之我同老公就有咁遠企咁遠，等到月台無乜人，係無人催嘅情況下，先慢慢同小火車影左2張相就上車。

旅遊書話單、雙數座位2邊都有機會向河或向山，只係多少問題。而雙數座位係向河多過向山，景觀係靚d。

而好好彩我地嘅座位係雙數位（無特別要求，係賣飛個阿姐畀），一開始已經有河景睇，即刻影相。連坐隔離位嘅乘客都企起身，走出黎影相。

大家只顧住影相，完全無理個車長伯伯係度介紹沿途風景，不過佢係講日文ga。

影下相好快就到尾二個站-嵐山駅，落車上樓梯後，有個伯伯係度收車飛。一出車站，就見到有幾個人力車伕係度兜生意。

沿住指示牌，幾步路就到竹林之道。我記得上次係5月中嘅時候黎，覺得呢度好宏偉，一排排好高好高嘅竹林種係路嘅2邊，而且無乜人，個畫面係好靚。

但今次係有一團一團嘅旅客，再加上有好多好多日本學生黎課外學習，係無論企邊影相，都影到一棚人。諗住等d人走咁d先影，係無可能ge，因為係不斷有人黎ga。

影左3、4張，就繼續行。無耐就到天龍寺北門，就買飛入場。入左場就少人d，可以係個將園藝打理得好靚嘅花園度周圍影相。

一路向前行就到曹源池，就不停影相，因為個庭園真係幾靚。

影完就由正門走，沿路有其他細嘅寺廟，係門口影下相就走。

之後就係條大街度周圍行，買下手信街邊小食，再搵間野食晏。

食完就行去渡月橋影下相。本來諗住過埋橋去中之島睇下，但實在太熱太囇la，我地都係決定搭嵐電走la。

閱讀更多 »