幾日後，就上左去攝影師嘅 office，睇下佢D作品。
阿攝影師 Gary 同我地介紹個成長片段嘅特別地方，不過我地由頭到尾都無諗住整，因為我地唔覺得婚宴一定要播，況且睇完都唔會記得 ga la，同埋要我地摷番D陳年舊相出黎，之後又要揀一輪，真係唔好煩我地。
我地同攝影師話唔要，佢話 package 包埋，我地都係話唔需要，重反問可唔可以換其他野，咁當然無 la。
Gary 問我地要唔要即日 video，我地話唔駛 la，無諗住係果睌播任何 video。佢又問我地整唔整即日派相，一樣唔駛 la，唔好攪咁多野，費時煩。
之後，我地就落左訂。真係好，又搞掂左。
到左4月中試妝，因為果日係平日下午，所以我請左半日假去。試妝總共用左3個多小時，試左4個髮型、2個妝。
老公放工後黎，佢見到我個妝，無乜特別意見，我亦一樣。果時覺得個妝都ok，而我一黎唔想再坐3粒鐘去試第二個 mua，二黎其實果時我皮膚敏感岩岩好番無耐，唔想D皮膚受太多刺激，所以，即時落訂。落訂嘅時候，我有D感覺怪怪地，但唔知係乜。不過，又 ko 左一樣，真係好。
到4月尾，去試婚紗晚裝。果日去之前，我地先去左冠南華到睇裙褂。我地都唔係好知點揀，有個阿姐就畀本相簿我地睇，但依然唔識揀。阿姐就講解下D款式，咁我話想要件多D紅色嘅，佢就入倉攞。一入就入左去3、4分鐘，之後拎左件多紅色嘅褂，我著左上身，覺得好怪。
阿姐話試埋多金銀線嘅，我話好，佢又入倉入左幾分鐘，之後拎左另一件多金銀線ge，又著上身，yee，呢件望落順眼好多wo。阿姐話呢件係全新，頭先果件係已租過一次出去。其實，阿姐，你講左我都分唔出 wo。最後，我就揀左順眼果件
搞掂完褂，再叫阿姐搵件紅色睡衣睇下。得2個款，就是但揀一套，畀埋$就走 lu。我諗前後只用左20分鐘，就出發去試婚紗。第一日試3間，第二日試4間。
試衫係唔畀人影相，係無相番睇嘅情況下，而中間又試左咁多唔同款式，最後只可以憑第一感覺去揀。呢樣對我黎講係 ok，因為重複畀我揀嘅話，反而仲難下決定。
對於婚紗，我無乜特別想要D乜款，因為我覺得每一件婚紗，無論長、短、lace、satin、低胸、露背，都有佢嘅靚，只係岩唔岩我著。不過，有一款我係唔會揀，就係蛋糕型。
最後，係 Blanc House 揀左一件 lace 長尾，加一個好長嘅頭紗。點解揀，感覺，亦可能因為係我第一件試 ge，先入為主gwa，哈
至於晚裝，我會揀2套，但比起婚紗，晚裝有更多更多嘅款式，仲難揀。最後，揀左間老闆娘好鬼好人咁畀我試左好多件、多過試衫費所規定嘅舖頭 Bridal World。佢D晚裝款有D好誇張，唔岩我。岩我嘅係簡單果D，都有細緻特別嘅地方。不過，主要都係我係果度試衫試得舒服。
試完，考慮左幾日，就落訂。又搞掂！
4月中去 Mode 試男禮，因老公要求唔高，好快咁揀左一黑一白，再造埋恤衫，就落訂。又又搞掂！
沒有留言:
發佈留言