大約0830出到火車站，趁未夠鐘，老公同攝影師去 Coop 到買早餐。（唔知點解大部份 Luzern 酒店唔包早餐，當然可加錢，但要畀40瑞郎一個早餐，好似貴左D lor）
呢程要搭2個鐘，我地揀左手邊坐，但係原來右手邊風景靚D。當一見到風景靚，就唯有企起身行去右手邊影相。
一落火車就行去酒店 check-in。行行下竟然落雨，仲要越落越大，即刻快步入酒店。
上到酒店房，有D呆左，咁鬼細，我記得book時寫明嘅floor area 無咁細 ga wo，但我手上只有confirm booking 嘅單，無寫到 floor area，又無wifi，上唔到網，打電話落去問reception，係佢講英文唔係好掂嘅情況下，佢話係得呢2間，谷鬼氣。一陣又要影相，但出面好似倒水咁，心情係忟 lor。
我諗 Interlaken 酒店係無裝冷氣，上次係 Lauterbrunnen 住果間都無，反而有暖爐，可能位處山區，鄰近雪山。係酒店房就咁開窗，都好似開左冷氣咁。
出發黎瑞士前係 Europcar website 度租左架車，用黎今日影相用。由於出面落緊大雨，老公話等雨細D先出去攞車，反正我都要化妝。
等到大約中午12點，雨細左，老公同攝影師出去攞車。過左1個鐘，老公返黎話攞唔到車，因為間野閂左門，放 lunch 時間，2點再辦公。天呀！我竟然忘記左，呢度D人興休午巿。
心情更忟，因為全日行程 delay 左，不過呢次係忟自己無記性。化完妝換埋衫，照下鏡，見有一個好靚嘅造型同件衫，心情好左D。哈！
就係咁，老公又去 Coop 度買麵包食當 lunch， 因出面仲落緊大雨，唔想化好妝周圍走。
到2點，佢地出去終於攞車成功，雨又停左，出發 lu。
我同老公都唔識揸車，唯有要攝影師做臨時司機，老公坐隔離睇住個 GPS。沿途風光好靚，望到 Thunersee，架車越行越入山區，攝影師同老公坐係前面嘩嘩聲，我諗呢D就係駕車樂趣。But sorry， 我唔明。
我地今次目的地係 Blausee http://www.blausee.ch/wb/pages/en/welcome.php?lang=EN
呢個地方旅遊書無講，我係其他 blog 度見到，覺得好靚。Blausee 係一個湖，湖水係綠色，圍住個湖行，我諗30分鐘行完。呢度要畀每人5瑞郎入場費。
本身心情係忟同不安，但入到去 Blausee，見到個湖，所有野已唔記得，心情即刻好晒。
我地係度逗留左1個多小時，就走la，因有關門時間。
本身下一個目的地係去 Grindelwald。但車程要1個鐘，回程又要1個鐘，而且天氣仲係灰灰沈沈，我又怕落大雨，就決定係回程路上，行到邊影到邊，就係咁，架車行下停下，見到靚景就落車影相，有車真方便。其實天氣幾凍，又有少少頭痛，影影下已有D唔想落車，因為係架車度好暖。
影到7點幾就收工 lu，又開始落雨，返酒店休息一陣，就出去食飯。連續幾餐都食包，而且攝影師同化妝師明天走 la，今晚就食好D，去食瑞士傳統餐。（其實係我想食，哈！）
有芝士火鍋、煎薯餅、雜肉拼盤、仲有個唔知乜鬼烤雞扒。
食飽、好攰、加飲左白酒，等攝影師冒住大雨攞車返黎，就返酒店 lu。
落妝、沖涼、瞓覺。
沒有留言:
發佈留言