德國旅行 2014 - Day 4 Munich, Zugspitze

今日搭10:32班車去Garmisch-Partenkirchen，1粒鐘多d就到。落車沿指示"Zugspitzbahn"行，十幾步路就見到左手邊嘅上楚格峰嘅登山火車。係counter買飛，然後用張飛入閘，上火車等夠鐘開車。(http://zugspitze.de/en/summer)

架火車唔係好多人，搭15分鐘就要係Grainau轉車。然後再搭15分鐘到Eibsee，可以喺呢度落車，然後向Eibsee方向行2-3分鐘，係Seilbahn搭吊車上Zugspitze。我地諗住回程先搭吊車，所以無喺度落車。

再搭45分鐘火車就到Zugspitze glacier，落車向前行，經過餐廳後，就係戶外雪地。出戶外之前著番件抓毛外套，因為好凍，而且天氣唔係咁好，好多雲、大霧、大風，基本上望唔到山下風景。

喺度見到班講國語嘅旅行團，其中有幾個人圍左個大圈兼大嗌，圈中有2個人係度玩摔交！

行左一陣就繼續沿指示，去搭cable car上Zugspitze summit。喺度等cable car黎嘅時候，本身個等候區得幾個人，過左幾分鐘後，果班旅行團湧埋入黎，個等候區企滿晒人，兼好嘈！

架cable car一黎，佢地即刻湧晒上去，咁我地咪等下一架law！

Cable car 4分鐘就到頂，又沿指示上去觀景台，都係白濛濛，乜風景都睇唔到。行下行下就到左標示住奧地利國境嘅地方，因為楚格峰位置係德國同奧地利嘅邊界上，所以，我地叫做去左Austria 2分鐘咁大把。

觀景台有個戶外餐廳，但係我真係頂唔到又凍又大風咁食野，所以去番室內，是但搵一間餐廳lunch。

食完就搭cable car直去Eibsee，10分鐘車程。如果可以，企左手邊可以望到Eibsee成個景，超靚。但我地企係右邊（當時cable car超多人搭，無多餘位畀你行黎行去），而且之前山頂係得一片白濛濛，只係上黎果程火車見到幾秒，但影唔切相。

到左Eibsee，左手邊有間餐廳，門口見到有個火爐烤緊鱒魚，好似好正。如果唔係岩岩喺山頂食左lunch，一定會試下，因為對正Eibsee、又無乜人，幾舒服！

再向前行，有得玩水上單車、划船。我地無玩，向右手邊行，經過間酒店，再向前行，見到有條樹林路。呢條路都係沿住湖邊，兩旁有高大嘅樹，有d森林feel。

行左20分鐘，見到有條橋就返轉頭，因為已經3點幾，我地又唔知圍住個湖行一圈要幾耐，所以都係走la。

番到Munich，就係酒店對面揾左間餐廳。呢間超得，係成個trip最好食、個靚仔staff超nice（雖然大部份German都好nice ga）、又平，好可惜最後一晚係Munich先發現到依間餐廳。