拖住個喼行10分鐘到火車站，今日去Munich，中途係Stuttgart轉車，會用Rail Pass。落去月台，即刻望下個display mon，我地班車又話要遲5 分鐘。
40分鐘到Stuttgart，即刻快步行去轉車個月台，點知我地要搭果班車好彩仲未到，因為又話要遲25分鐘。
咁我地去買定d麵包上車食，同埋去洗手間。火車站嘅洗手間要畀EUR1，因為係好乾淨。火車上嘅就唔駛畀＄，但就略為多人用，尤其係果d ICE長途車。
班車終於到！2個令鐘後到Munich！
我地黎緊住3晚嘅酒店，就係火車站隔離，非常方便！
攞完房hea一陣，就出去舊城區行。經過火車站，發覺附近好多人企係度唔知做乜，但沿路行去舊城區又無乜人，不過，一到舊城區係超多人。
條大街2旁都係商店、百貨公司、餐廳，我地邊行邊睇，之後去到新市政廳，一大堆人企晒係度，原來就黎5點，等緊鐘樓嘅機械公仔演出。咁我地又企係度，因為仲有5分鐘就開始。哈，我地睇左3分鐘就走左，因為d公仔行得好慢。
轉右就係食品市集，即係似街市咁，亦有d露天餐廳，但係坐滿晒人。兜左個圈就走，係橫街亂行左一陣，已經好攰好餓，突然見到有間餐廳個櫥窗，掛滿一隻隻燒到好靚嘅咸豬手，就決定今晚dinner係度食。
坐低無耐，有個waiter就攞左一大盤咸豬手黎，每隻咸豬手插左支旗仔，寫住幾＄，我地揀隻最平最細隻ge，再嗌左佢推介嘅德國腸、沙律，唔少得德國啤酒（只係老公飲，兼餐餐都飲，我本身唔係咁仲意啤酒）。
個咸豬手都ok，但食過一次就夠，好大隻好漏，可能多人食會好d。之後番酒店，睇旅遊書先知除左好多遊客去ge HB，呢間餐廳亦係以咸豬手出名嘅。
食完就去百貨公司入面嘅supermarket，一次過買左好多飲品，咁黎緊2日旅程就可以慢慢歎。
跟住番酒店，等睇世界盃第一場賽事，不過，我睇左半場就瞓覺，老公就繼續睇。
沒有留言:
發佈留言