德國旅行 2014 - Day 6 Berchtesgaden, Konigssee, Ramsau

今朝酒店個早餐係個簡單buffet，食完就行上去Berchtesgaden個市中心，係酒店上斜路約5分鐘到。

係度兜左個圈，去supermarket買左水，就行番落巴士站，搭841去國王湖。

今日可以係條大街度慢慢行，睇下2旁嘅舖頭，仲有好多酒店，一路行到街尾就係國王湖。去右手邊嘅ticket centre買船飛，EUR16.9來回已可以去Kessel、Salet、St. Bartholoma。(http://www.seenschifffahrt.de/en/koenigssee/)

果時係約中午12點，好多遊客，所以基本上d船仔坐滿就開。除左揸船個staff，另外仲有個staff負責用德文+英文介紹景點，中途經過有回音嘅山谷，佢就會吹奏樂器，真係有回音ga。跟著佢就會行去每個遊客身邊，收取tips，有人有畀，亦有人無畀。

我地架船無停Kessel，通常有人行山先會係果度落船。去到St. Bartholoma，有一半人落左船，我地就繼續搭船去Salet。呢個咁嘅船程要1個鐘45分，因為佢開得好慢。

係Salet碼頭附近，先會見到個湖係好靚，d湖水好清，周邊係茂盛嘅草地樹林、高聳嘅山涯、雪白嘅山頂。

沿住指示牌，一路向前行約7、8分鐘，就會到Obersee。呢度好多人，個個都企係湖邊影相，因為湖嘅全景相+倒影係好靚，但果日無倒影，因為有風。與其係湖邊同人逼，我地企遠d，都一樣影到ga。

右手邊有條路可以行去湖嘅對面，果度有個農舍，聽聞summer time有免費牛奶。經過農舍再向前行，會去到Rothbachfall（德國最高waterfall）。但我地無行，因為唔夠時間來回，唉！我地喺度食埋lunch，之後搭船去St. Bartholoma。

係St. Bartholoma參觀下教堂，買下紀念品，又搭船回程，但要排15分鐘隊，先上到船。

本身諗住搭巴士出番火車站，再轉巴士去Ramsau Kirche。但老公想睇6pm果場世界杯@$？#%&*，咁就搭的士直去Ramsau。

上左taxi，我喺度睇下save左係電話嘅巴士班次，諗緊可以係Ramsau逗留幾耐。15分鐘就到，落車又想check下個電話，先發現唔見左！

果時係超徬徨，好明顯知道漏左係taxi度，但架taxi已繼續向Hintersee方向行，一早走左，而且我地完全無留意個車牌號碼或司機名。係無任何諗法嘅情況下，我地行過對面線，好似希望架taxi會兜返出黎。

唔夠1分鐘，真係有架taxi出番黎，唔理三七廿一，即刻截停佢。然後個腦淨係諗到一條問題：問司機係咪岩岩載完我地？佢答係！嘩！果刻我個腦又係一片空白，問都唔問，即刻開後座門揾番我個電話，真係係度！

老公就同司機解釋我漏左個電話，佢見我攞番個電話，就露出恍然大悟個樣，之後我地十萬個多謝，送走架taxi。真係多謝司機認得我地，同埋多謝佢容忍我咩都無講就開佢架車後座門！超感激！

之後，就係附近行下，我揀黎呢度係見人地個blog，喺呢度影左好靚嘅相，想黎睇下。行下個教堂，再去小溪果邊影相，條溪水好清，呢度好舒服好寧靜，無乜遊客。其實，呢度可以行去Magical Forest + Hintersee，腳程好似約2粒鐘，好可惜唔夠時間。

逗留左半粒鐘，就搭巴士no. 846走la。我地去番Berchtesgaden市中心dinner，因為6pm場世界杯有德國踢，所以市中心呢度有露天表演。

我地快食左個dinner，其實幾好食、又平，如果唔係老公要趕住番酒店睇波，呢餐可以嘆耐d。食完就急急腳番酒店，仲有下半場畀老公睇。