呢間酒店係包自助早餐，算係呢個trip最豐富嘅早餐。不過，對我無咩分別，我都係食麵包、cold cut同飲熱茶。
食完搭巴士去Sils。呢度天氣明顯好凍，著左好多衫先出門，有抓毛外套、羽絨、頸巾，同埋遮，因為落緊雨。
到左Sils，問完人係邊度搭馬車去Fex Valley，見仲有時間，就行去Sils湖。沿路無乜人，愈近湖邊，風愈大，好鬼凍。
到左差唔多時候要番去搭馬車，就回頭走，因為唔想再重複琴日咁趕頭趕命。
我地匿係Hotel Sils Maria入面等馬車，因為出面又凍又落雨。過左一陣，架馬車已停左係出面，見有個帳篷搭起左黎擋雨，我地就上馬車。
酒店D人話呢架馬車係每日都有，我諗如果無我地2個，佢依然開去Fex Valley，因為佢有個固定行走時間表。
果2隻馬都有帳篷冚住係身，車伕亦有著雨褸，因為佢要淋住雨駕車。如果同佢溝通，有D難，佢D英文唔係好好。
原本架馬車應該可以坐到9個人（如果以亞洲身型黎計），但落雨關係，到左夠鐘出發，都係得我地2個，哈！亦因為咁，我地先可以係架車上面，好free咁前後左右轉身影相
相信如果好天嘅話，風景會好靚。不過，我又覺得落雨大霧嘅風景，又有另一番味道！
約1粒鐘後，到左終點Hotel Fex。架馬車要1個多小時後先回程，我地就係酒店入面食個lunch。
間餐廳只有我地2個，同一對外國夫婦。佢地一身行山裝備，問我地係咪hiking，我答唔係ar，係坐馬車黎。跟住我話today is very cold，個男人笑住答話it's cool today。我再話now is raining，個女人笑住答it's ok。
如果畀著我係香港，係唔會落雨行山。同埋，我身體潺弱，對於呢度接近零度天氣，我係覺得vvvvvvvvvvery cold！！！
食完lunch，原本諗住早D上馬車，佢就會早D開車，反正得我地2個。但佢依然係等到夠鐘先開車。
回程路就少左影相，因為愈黎愈大風、愈黎愈凍。
之後返去酒店休息一陣，加番羊毛底，再出去St. Moritz湖度行。
天氣仲凍左大風左，要用頸巾冚住口鼻，先頂得順。行下行下，先發覺湖邊嘅野花已經無乜，景色同上次7月頭黎嘅時候，差好遠law。
行完上St. Moritz Dorf兜個圈，然後搭巴士落番St. Moritz Bad度搵野食。不過，搵唔岩，就番去我地酒店間餐廳度dinner。
個frd話想食raclette，而我又岩岩食晒D藥，雖然個胃仲有D頂住，但黎到瑞士點都要食raclette ga la，所以叫左1個raclette同1客salad。
我諗住1個raclette唔夠食，因為我之前係瑞士食唔係好大碟，所以嗌多個salad。點知呢度畀左6大塊芝士加一個細電爐我地，自助形式整raclette。
雖然，自己整溶D芝士都幾得意，不過，硬係覺得無地道人整得咁好食，仲要溶極個邊都係硬ge，感覺怪怪地。而且食左一塊之後已覺得好漏好飽，最後我食多半塊度，怕個胃又唔舒服，就投降。
沒有留言:
發佈留言